।। दाई-ददा ।।
छोड़ के तै गुमान ल संगी।
बन जा पिरीत जोड़इया ग।।
चारदिनिया हे जिनगी हमर।
दाई ददा ल झिन भुलइहा ग।।
जाही त नइ पावच ओला।
फेर गुन गुन के तै रोबे ग।।
ओही दाई के मया कोरा ल
कोनो जिनगी कइसे पाबे ग।।
सौ जनम ल कोन ह देखे।
पतियाए काकर भाखा ग।।
इही जिनगी दुख पीरा के।
करले इहेच हे पुन पाप ग।।
ए जिनगी एक बार हे संगी।
दाई ददा घलो एकबार हे ग।।
कइसे छुटबे तै मया के लागा।
ए जिनगी ओखर उधार हे ग।।
छोड़ के तै गुमान ल संगी।
बन जा पिरीत जोड़इया ग।।
चारदिनिया हे जिनगी हमर।
दाई ददा ल झिन भुलइहा ग।।
कोई टिप्पणी नहीं:
एक टिप्पणी भेजें