मिलन मलरिहा
**परमाण पत्र **
परमाण पत्र पाके कइसे तै करबे
जाने सीखे रहिबे तभेच आघु बड़बे
-
इसकुल कालेज कमाई के हे अड्डा
बेचावत हे डिगरी फेर का के चिनता
बीए एमबीए ह ठट्ठा मजाक बनगे
कमपुटर के घलो पानठेला म बिकथे
बारवीं निकलना हावे ओपन म भरदे
माथा म चटकाके गली गली गिन्दरबे......
परमाण पत्र पाके कइसे तै करबे
जाने सीखे रहिबे तभेच आघु बड़बे
-
नकली ह आघु बड़गे असली पिछवागे
बुद्धी के देवइया आज पइसा म मतागे
राहेरदार माड़गे संगी अकरीदार बेचागे
गली गली ठलहा खड़े, बेरोजगारी आगे
नौकरी खोजत खोजत जिनगी ह पहागे
अउ कतेका डिगरी धरबे तय सकेलबे....
परमाण पत्र पाके कइसे तै करबे
जाने सीखे रहिबे तभेच आघु बड़बे
-
रापा गैती कुदारी हसीया के चलइया
कबले इनजीनीअर कागज पाए भइया
एक महीना म पाॅजीडीसीए घलो पाए
पानठेला म बइठके सबला पान खवाए
दूसरेच महिना म बीएड बीना कहु जाए
एतिओति बाराकोति करके का करडारबे....
परमाण पत्र पाके कइसे तै करबे
जाने सीखे रहिबे तभेच आघु बड़बे
-
पड़हाई -लिखाई ल हासी मजाक बनाके
साटकट के रद्दा म चलके कतेक देखाबे
आमा गोही धरके गियान गुदा कइसे खाबे
परवर अउ कुँदरु के भेद अंतस म धरके
छोड़के बेइमानी बुता काम ल बने सीख ले
सतरद्दा म चलके एकदिन मनजिल ल पाबे.....
परमाण पत्र पाके कइसे तै करबे
जाने सीखे रहिबे तभेच आघु बड़बे
-
-
-
-
मिलन मलरिहा
छत्तीसगढीहा
9098889904
बड़ सुग्घर मिलन भईया
जवाब देंहटाएंआज ईही होवत हे
हमर शिक्षा विभाग म।
बहुत बहुत बधाई अऊ शुभकामनाएं।