जागव

।। जागव ।।

मोर छत्तीसगढ़ीया भाई मन

कइसे कइसे ठगावत हे

हमर भाखा बोली ल सीख के

हमीं ल बुद्धू बनावत हे

असली छत्तीसगढ़ीया मन

जांगर टोर कमावत हे

नकली बनके आहे तेमन

महल अटारी बनावत हे

असली मन ह दब्बू होके

अवाज नइ उठावत हे

दूसर राज ले आहे तेमन

अपन दबंगई देखावत हे

कब तक चलही अइसने भाई

मोर छाती ह कल्लावत हे

अपन हक के लडे खातिर बर

अब नस नस ह फडफडावत हे

जागव जागव जागव भाई

सुत के झन पहावव

मोर छत्तीसगढ़ महतारी बर

सब झन आघू आवव

जागव रे मोर छत्तीसगढ़ीया

रचनाकार - महेन्द्र देवांगन "माटी"

पंडरिया जिला कवर्धा

(बोरसी - राजिम)

मोबा.- 8602407353