कब सिताही

कब--सिताही

▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪

मंहगाई के सुरसुरी ह जरत हे

लूटखसोट के बत्ती ह जगर-बगर बरत हे

बेरोजगारी के अनारदाना छरछरावत हे

जलइया के अन्तस् हा भरभरावत हे

घोटाला के बम धड़ाम-धड़ाम फूटत हे

भ्रष्टाचार के रॉकेट ह साँय-साँय छुटत हे

आतंकी चुटचुटिया चुट-चुट चुटीयावत हे

नक्सली गोली साँप ह भारी अंटियावत हे

घुंसखोरी के चड़चड़ी हे

नशाखोरी के लड़ी हे

गरीबी के चकरी ह रठ्ठ घूमत हे

देख तो देखइया मन कतका झूमत हे

फेर शान्ति के गेसबत्ती ह जरत नईये

भाईचारा के टिकली ल कोनो फोरत नइये

सुंदर माटी के दिया अब पिसान होगे

काल लइका अब सियान होगे

गुनत हे ऋषि,अईसन दिन ह कब सिराही

अईसन फटाका के बत्ती ह कब सिताही

▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪

रचनाकार - ऋषि वर्मा 

निनवा बैकुंठ तिल्दा रायपुर 

मोबाईल :- 9009087489