गीत - मोर सपना के गांव
▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪
हाना-हाना मा डोले मोर सपना के गांव
पाना-पाना हा बोले महतारी के नाव
झुनुक झेंगुरा हर गावे फुदुक टेटका मगन
आनी-बानी के फूल इहाँ हरियर उपवन
बाना-बाना मा बोले मोर सपना के गांव
पाना-पाना हा बोले महतारी के नाव
धरे नांगर तुतारी धनहा बीजहा माटी
धरती दाई के दुलरवा के भुईयां थाती
गाना-गाना मा झूमे मोर सपना के गांव
पाना-पाना हा बोले महतारी के नाव
ऐंठी,चूरी, महावर छिंटही लुगरा पहिरे
तीजा-पोरा मा ठमके बेनी फुंदरा झुमरे
रीति-रीति मा गावे मोर सपना के गांव
पाना-पाना हा बोले महतारी के नाव
चंदा सुरूज चमके कोयली कुहुक गावे
भाखा- बोली मया के इहाँ मंदरस घोरे
ताना-बाना मा झूले मोर सपना के गांव
पाना-पाना हा बोले महतारी के नाव
▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪
रचना - शकुंतला तरार
जिला रइपुर छत्तीसगढ़
नारी का संबल
shakuntalatarar7@gmail.com
बहुत सुघ्घर रचना बधाई हो
जवाब देंहटाएंअत सुंदर गीत शकुन्तला जी। बधाई
जवाब देंहटाएं