छत्तीसगढ़ के पागा कलगी भाग - ०१

छत्तीसगढ़ के पागा कलगी भाग - ०१ 

------------------------------------------------

छत्तीसगढ़ी मंच द्वारा संचालित

छत्तीसगढ़ी कविता प्रतियोगिता

छत्तीसगढ़ के पागा "कलगी" भाग - 01

01 ले 15 जनवरी 2016 तक

विषय - बदलाव नवा साल मा

विजेता - देवेन्द्र ध्रुव (फुटहा करम)

बेलर फिंगेश्वर जिला - गरियाबंद

ध्रुव जी ल बड़ अकन बधाई छत्तीसगढ़ी 

मंच के तरफ ले।

विजेता के रचना ह दैनिक समाचार पत्र 

किरण दूत रायगढ़ अऊ अंजोर छत्तीसगढ़ी 

मासिक पत्रिका म प्रकाशित हो गे हे। 

-------------------------------------------------------

बदलाव नवा साल मा

-------------------------------------------------------

धान के कटोरा उन्ना होवत हे

धरती दाई के कोरा सुन्ना होवत हे

आज अन्नदाता मुड़धर के रोवत हे

अपने हाथ अपन जान लेवत हे

फोकट समा जावत हे काल के गाल मा

अब तो सुधार होना चाही इकर हाल मा

बहुत जरुरी हे "बदलाव नवा साल मा"

का करबे किसनहा ला कोनो नई पुछय

कर्जा मा जीयय, कर्जा मा ओखर प्राण छुटय

अब हर योजना किसान के नाम होना चाही

टाल मटोल नही अब तो बस काम होना चाही

अब ककरो फसल झन बोहावय बाढ मा

अऊ कोन्हो झन मरय ऐ दारी अकाल मा

बहुत जरुरी हे "बदलाव नवा साल मा"

सिघवापन के फायदा उठाथे दुसरा मन

भाई ले भाई ला लडाथे दुसरा मन

नई समझय अबड़े मीठ आखिर कड़हा होथे

सब ला अपन समझथे गवंईहां अड़हा होथे

अब जागव, झन फंसव कोनो जाल मा

दुश्मन झन होवय कामयाब अपन चाल मा

बहुत जरुरी हे "बदलाव नवा साल मा"

पता नही काबर सब संग दुरिहाये हव

पता नही काकर बुध मा आये हव

परवार सुघ्घर पेड़ ऐला झन काटव

अपन अऊ पराया मा कोनो ला झन छांटव

जुरमिल के रहव जी घर ला झन बांटव

घर ला छोडे के बात झन लानव ख्याल मा

बहुत जरुरी हे "बदलाव नवा साल मा"

दुख परगे ता उदास झन बईठव

जीत घलो मिलही हताश झन बईठव

चुनौती दिही गा बेरा रही रही के

आघुं बढ़ना हे सबो पीरा ला सहिके

सब मुश्किल के हल अऊ मुंहतोड़ जवाब

झन पड़े रहव दुनियादारी के सवाल मा

बहुत जरुरी हे "बदलाव नवा साल मा"

जान लो परदेशिया ला राजा नई बनाना हे

दुसर के बात मान परबुधिया नई कहाना हे

सब ला उन्नति के नवा रद्दा बताना हे

अपन मेहनत ले तरक्की ला पाना हे

फेर महकही फुलवारी, सुख आही दुवारी

कोयली फेर गीत सुनाही बईठ आमा के डाल मा

बहुत जरुरी हे "बदलाव नवा साल मा"

------------------------------------------------------------

प्रतियोगिता म भाग लेवइया जम्मो संगी

मन ल बहुत बहुत बधाई आभार - ललित साहू, 

राजेश निषाद, मिलन मलरिहा, ओमप्रकाश चौहान, 

रामेश्वर शांडिल्य, दिनेश देवांगन ओमप्रकाश चंदेल, 

हितेश तिवारी, विजय साहू, देव हीरा लहरी, 

महेश पांडेय मनु, ललित टिकरिहा।