छत्तीसगढ़ी कविता प्रतियोगिता
छत्तीसगढ़ के पागा कलगी भाग - ०२
बिषय - चित्र अधारित
१५ ले ३० जनवरी २०१६ तक
विजेता - दिनेश देवांगन "दिव्य"
विजेता के रचना ह दैनिक समाचार पत्र अउ
पत्रिका मन में प्रकाशित होय हे
दैनिक अखबार किरण दूत
अंजोर छत्तीसगढ़ी मासिक पत्रिका
छत्तीसगढ़ी साहित्य संग्रह
देवांगन जी ल छत्तीसगढ़ी मंच के
तरफ ले बहुत बहुत बधाई अऊ शुभकामनाए
----------------------------------------------
गरीबी के जिनगी
---------------------------------------------------------------
मैय छत्तीसगढ़ के लइका अव, निकले हव भाग सँवारे
अउ ओला देवत हव सिक्छा, जो जिनगी ले हे हारे
जाड़ महीना सुत बिहनिया, नहाथव ठरत पानी मा
सुरपुट खाथव चटनी बासी, मिरचा आमा चानी मा
मुख इसकुल के नई देखेंव, का जानव ए बी सी डी
पान बनाथव मस्त मगन मय, खाथे जग हैरानी मा
आत जात मनखे मन मोला, आँखी ला फार निहारे
मैय छत्तीसगढ़ के लइका अव, निकले हव भाग सँवारे
अउ ओला देवत हव सिक्छा, जो जिनगी ले हे हारे
घोर गरीबी घर मा हावय, नई महीनत ले डरथव
डाहर मा कतको हे बाधा, डाहक डाहक मय बड़थव
अँधवा मोर दाई ददा के, मय हव एक श्रवण बेटा
हसी खुसी दुनिया के जम्मो, ओखर गोड़ तरी धरथव
कतका गहला हावय पानी, नई सोचव तरीया पारे
मैय छत्तीसगढ़ के लइका अव, निकले हव भाग सँवारे
अउ ओला देवत हव सिक्छा, जो जिनगी ले हे हारे
बहिनी मोर जिगर के टुकरा, ऐखर भाग सजाना हे
काँटा हावय जो जिनगी हा, ओमा फूल खिलाना हे
तयबेटी अस बेटा बनके, कुल के नाव ला बढ़ाबे
मोर भरोसा पक्का हावय, देखी काल जमाना हे
तोर मया बर ऐ जिनगी के, जम्मो सुख ला मय वारे
मैय छत्तीसगढ़ के लइका अव, निकले हव भाग सँवारे
अउ ओला देवत हव सिक्छा, जो जिनगी ले हे हारे
---------------------------------------------------------------
रचना - दिनेश देवांगन "दिव्य"
सारंगढ़ जिला - रायगढ़, छत्तीसगढ़
---------------------------------------------------------------
प्रतियोगिता म भाग लेवइया जम्मो रचनाकार संगी
संगवारी मन ल छत्तीसगढ़ी मंच अऊ किरण दूत
दैनिक समाचार पत्र रायगढ़ के तरफ ले बहुत
बहुत बधाई अऊ शुभकामनाए।
सुखन जोगी, असकरन दास, देवेन्द्र कुमार ध्रुव,
रामेश्वर शांडिल्य, मिलन मलरिहा, दिनेश देवांगन
दिव्य, ललित टिकरिही, हितेश तिवारी,
ओमप्रकाश चौहान।
कोई टिप्पणी नहीं:
एक टिप्पणी भेजें