।। नांगर मुठिया धरे नंगरिहा ।।
मुड़ म खुमरी, कमरा ओढ़े खा के चटनी-बासी
नांगर मुठिया धरे नंगरिहा डोली म करत हे बियासी
सुरुर-सुरुर पवन चलत हे,संग म धरे हे पानी
गड़-गड़ बाजय इंद्र के बाजा,नाचत हे बरखा रानी
झेंगुरा बपुरा गाना गावय मेचका ल छूटगे हांसी
नांगर मुठिया धरे नंगरिहा डोली म करत हे बियासी
अरतता बइला ल खेदय,रेंगत गावत हे ददरिया
लकर-लकर बइला रेंगय,धरे बर हे अउ हरिया
बिछलत मेड़ बनिहारिन रेंगय चुहरही खार मटासी
नांगर मुठिया धरे नंगरिहा डोली म करत हे बियासी
करिया-करिया बादर दिखय,मया जल बांटत हे
हांसत-कुलकत हे किसनहा,मारे खुशी के नाचत हे
धरती दाई घलो मगन हे,नइ दिखय कहूं उदासी
नांगर मुठिया धरे नंगरिहा डोली म करत हे बियासी
कोई टिप्पणी नहीं:
एक टिप्पणी भेजें