जेन घर सियान तउन सरग कहाथे

जेन घर सियान तउन सरग कहाथे

▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪

कोचराय हे देहे ,पेचके हे गाल

निहरे हे कनिहा, पाका हे बाल

मइलहा हे पटकू,चिरहा हे धोती

बबा रिसायहे जाने काखर सेती

बड़ देर होगे आज बडबड़ात हे

कोंटा म बइठके आँसू बोहात हे

लागथे बेटा ह फेर खिसियाय हे

धुन बहु कुछु नाव ले बगियाय हे

पाछु पंदरही बहू कतका सुनाइसे

तसमा का टुटगे नगत झरराइसे

भूखे पियासे तालाबेली दे रहिसे

जुड़ म बपरा परछी म सोय रहिसे

बहू-बेटा कोनो दया नइ खाइस

बपरा सोगे भीतर नइ बलाइस

नाती ल खेला खुस हो लेत रहिसे

अपन छाती ल जुड़ो लेत रहिसे

नाती ल  खेलाय बर बरज दिस

जीए के ओखी म पथरा चपक दिस

रही-रही बबा ल बीते दिन सुरता आथे

डोकरी के सुरता म मन कलप जाथे

अपन भाग ऊपर बिचारा बड़ पछताथे

जब-जब रोथे तब डोकरी ल गोहराथे

काबर लईका आज सियान ल रोवाथे

जेन रुख छाव देथे उही ल काट गिराथे

जेन घर सियान तउन सरग कहाथे

एला दुःख देवइया कहाँ सुख पाथे

▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪

रचनाकार - सुनिल शर्मा"नील"

थानखम्हरिया जिला - बेमेतरा

संपर्क नंबर - 7828927284

रचना दिनाँक - 09/12/2015