भुइंया के बटवारा

भुइंया के बटवारा
▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪
बटागे जम्मो खेती किसानी
अउ बटागे बियारा
तारी नई पटत हे भाई-भाई म,
घर दुआर के करत हे बटवारा

बटागे घर के कोंटा-कोंटा
नई बाचिस कोनो किनारा
घर के छानी, खपरा के,
होवत हे बटवारा

गिनागे थारी लोटा घर के
तमाशा देखे सब्बो पारा
रोस-रोस म दाई-ददा के घलो,
कर डारिन बटवारा

चारो कोती कुलुप अंधियार
होही कइसे उजियारा
कुटका-कुटका घर के करके,
कर डारिन बटवारा 

बाटत-बाटत देश बटागे
हर घर म अब होवत हे बटवारा 
जाति, धरम के नाम म होगे,
भुइंया के बटवारा
▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪▪
रचनाकार – तरुण बारले
धनसुली बाराडेरा रायपुर
मोबा. :- 9009191035