छत्तीसगढ़ी कविता प्रतियोगिता
छत्तीसगढ़ के पागा कलगी भाग - ०३
01 - 15 फरवरी 2016 तक
विषय - कलेवा (छत्तीसगढ़ के)
विजेता - दिनेश देवांगन "दिव्य"
विजेता के कविता विभिन्न पत्र-पत्रिकाओं
मे प्रकाशित होय हे, दैनिक अखबार
किरण दूत रायगढ़ से, अंजोर छत्तीसगढ़ी
मासिक पत्रिका, के अलावा छत्तीसगढ़ी
साहित्य संग्रह म भी प्रकाशित होय हे।
दिनेश देवांगन दिव्य जी ल बहुत बहुत बधाई।
---------------------------------------------
विषय - (कलेवा छत्तीसगढ़ के)
---------------------------------------------
सुनव सुनाथँव छत्तीसगढ़ी
किसम किसम के मय पकवान
धान कटोरा जेखर भुँइया
घर घर चांउर सोभयमान
घारी चीला अउ चौसेला
बबरा खाजा कुसली रोंठ
छतीसगढ़िया सबले बढ़िया
नई लबारी सत ये गोंठ
दाई खाथय ददा खवाथय
खुरमा कतरा के मिसठान
सुनव सुनाथँव छत्तीसगढ़ी
किसम किसम के मय पकवान
धान कटोरा जेखर भुँइया
घर घर चांउर सोभयमान
गर्भ सातवां बेटी के ता
कुसली पपची माँ भिजवाय
तीजा पोरा अउ तिहार मा
ठेठरि खुरमी सब ला भाय
खाथे बाबू अउ अधिकारी
डार मया जब देत किसान
सुनव सुनाथँव छत्तीसगढ़ी
किसम किसम के मय पकवान
धान कटोरा जेखर भुँइया
घर घर चांउर सोभयमान
दूध फरा सावन मा बनथे
भादों मा ईढर के चाप
जाड़ महीना चाउंर चीला
खा चटनी मा आगी ताप
बनय छींट के लाडू संगी
करथे जब जब कन्यादान
सुनव सुनाथँव छत्तीसगढ़ी
किसम किसम के मय पकवान
धान कटोरा जेखर भुँइया
घर घर चांउर सोभयमान
बरा कहाथे सुख दुख साथी
सादी या मरनी के भोज
पितर पाक मा हर घर बनथे
सरलग बरा पनदरा रोज
इही हमर सनसकरिति हावय
इही हमर हावय पहचान
सुनव सुनाथँव छत्तीसगढ़ी
किसम किसम के मय पकवान
धान कटोरा जेखर भुँइया
घर घर चांउर सोभयमान
--------------------------------------
रचना - दिनेश देवांगन "दिव्य"
सारंगढ़ जिला - रायगढ़
-------------------------------------
प्रतियोगिता म भाग लेवईया जम्मो कवि
मन ल अंतस ले आभार अऊ धन्यवाद।
नवीन कुमार तिवारी, महेश पांडेय मनु,
ओमप्रकाश चौहान, दिनेश देवांगन दिव्य,
देवेन्द्र कुमार ध्रुव, अशोक साहू, राजेश कुमार निषाद,
मिलन मलरिहा, ललित टिकरिहा, सूर्यकांत गुप्ता।
----------------------------------------------------------
sugghar rachana karat havas deenesh devngan divy ha chattisagad ke abbar sughghar rachcaa parosat havas,jai johar sangi
जवाब देंहटाएं