छत्तीसगढ़ के पागा कलगी
---------------------------------------------
छत्तीसगढ़ी मंच द्वारा संचालित
छत्तीसगढ़ी कविता प्रतियोगिता
छत्तीसगढ़ के पागा कलगी भाग - 06
दिनांक - 16 से 31 मार्च 2016 तक
विषय - चित्र आधारित(होली विसेस)
मंच संचालक - देव हीरा लहरी
(मिडीया प्रभारी पागा कलगी)
"छत्तीसगढ़ी भासा के प्रचारक"
निर्णायक मंडल -
1) डॉ.जे.आर.सोनी
वरिष्ठ साहित्यकार रइपुर
2) श्री पुष्कर सिंह "राज"
वरिष्ठ साहित्यकार बालौद जिला।
विसेस - ये पईत सबले जादा
रचना प्राप्त होईस हे कुल - 026
-------------------------------------------------
विजेता - मिलन मलरिहा मलहार
जिला - बिलासपुर छत्तीसगढ़।
पागा पहरईया के कविता ह विभिन्न
पत्र-पत्रिका मन मे प्रकाशित के साथ -
साथ छत्तीसगढ़ी साहित्य संग्रह म भी
प्रकाशित होय हे, दैनिक समाचार पत्र
किरण दूत रायगढ़, अंजोर छत्तीसगढ़ी
मासिक पत्रिका म।विजेता ल हमर
तरफ ले बहुत बहुत बधाई अऊ
शुभकामना।
--------------------------------------------------------
अटकू-बटकू, छोटकी-नोनी जऊहर धूम मचाए
--------------------------------------------------------
होली के रंगोली म, हुड़दंग मचे हे भारी
छोटकी-नोनी धरे गुलाल, पोतत संगी-संगवारी
अटकू-बटकू घरले निकले, तानके रे पिचकारी
एकेच पिचका म रंग सिरागे, फेर भागे दूवारी
रंग गवागे बाल्टी ले जईसे कुँआ ले अटागे पानी
पानी के होवत बरबादी, समझगे छोटकी-नोनी
पिचकारी ल फेंक सबोझन, थइली म भरे रंगोली
नांक-गाल म पोत गुलाल, खेलत हे सुक्खा-होली
छिन-छिन बटकू घर म जाके खुर्मी-ठैठरी ल लाए
संगे बतासा भजिया सोहारी अऊ पेड़ा ल खाए
अटकू-बटकू, छोटकी-नोनी जऊहर धूम मचाए...
नंगाड़ा नइ थिरके थोरकुन, बेरा पहागे झटकुन
डनाडन बाजय गमकय, सबके कनिहा मचकुन
मंगलू कहे सुन भाई कोदू, दारु लादे-ग चिटकुन
दूनोंके तमकीक-तमका म सिन्न परगे थोरकुन
झुमा-झटकी म झगरा होगे, पुलिस-दरोगा आगे
दारु-नसा के चक्कर म, किलिल-किल्ला ह छागे
मंगलू, कोदू पुलिस देख, गिरत-हपटत ले भागे
थिरकत नंगाड़ा ह फेर अपन मया-ताल गमकाए
अटकू-बटकू, छोटकी-नोनी जऊहर धूम मचाए...
बादर होगे रंग-गुलाली, सबोजघा हे लाली-लाली
हरियर-लाली रंग पेड़के, जइसे तिरंगा हर डाली
सरग-बरोबर लगे हमर छत्तीसगढ़ अंगना-दूवारी
नसा-तिहार झीन बनावा, मया-परेम बगरावा
छोटकी-छोटकू, नोनी-बाबू ल नसा झिन बतावा
नवा-पीढ़ी ल गोली-भांग, फूहड़ीपन मत सिखावा
भरभर-भरभर जरतहे होली, सत के रद्दा देखाए
भगत पहलाद के होलिका फूफू आगी म समाए
लईकामन भगवान रुप हे, कपट-छल नई भाए
दिनभर दउड़त-नाचत-खेलत जऊहर धूम मचाए...
---------------------------------------------------------
ये पईत कुल 26 रचना प्राप्त होईस
अऊ जम्मो के कविता एक ले बढ़
के एक जोरदार रहिस।प्रतियोगिता
मे भाग लेवईया जम्मो लेखक मन
बहुत बहुत धन्यवाद आभार अऊ
गंज अकन बधाई शुभकामना।
-------------------------------------------------
रचनाकार के नाव :-
1) दिनेश देवांगन "दिव्य" सारंगढ़
2) महेश मंगल
3) महेन्द्र देवांगन "माटी" पंड़रिया
4) सूनील शर्मा "नील" थानखम्हरिया
5) राजेश निषाद चपरीद समोदा
6) हेमलाल साहू गिधवा नवागढ़
7) आशा देशमुख
8) सोनू नेताम धमतरी
9) ललित साहू "जख्मी" गरियाबंद
10) देवेन्द्र ध्रुव "फुटहा करम"
11) शालिनी साहू साजा
12) देव साहू कपसदा
13) लक्ष्मी नारायण लहरे कोसिर
14) मिलन मलरिहा मलहार बिलासपुर
15) सुनील साहू निर्मोही
16) जय वीर रात्रे बेनीपाली
17) नवीन कुमार तिवारी
18) गरिमा गजेन्द्र सरोना रायपुर
19) सुखन जोगी डोड़की
20) सुखदेव सिंह अहिलेश्वर
21) रामेश्वर शांडिल्य
22) अशोक साहू भानसोज
23) सुर्यकांत गुप्ता भिलाई
24) संतोष फरिकार "मयारू"
25) आचार्य तोषण
26) अमन चतुर्वेदी बालौद।
----------------------------------------------
छत्तीसगढ़ी साहित्य संग्रह
http://sahityacg.blogspot.in
कोई टिप्पणी नहीं:
एक टिप्पणी भेजें